सोमपाल कामीको विस्फोटक ब्याटिङमा कर्णाली याक्सको रोमाञ्चक जित, विराटनगर स्तब्ध
कर्णाली याक्सले नेपाल प्रिमियर लिग (एनपीएल) को तेस्रो संस्करणमा विराटनगर किंग्सलाई रोमाञ्चक रूपमा पराजित गरेको छ। विराटनगरले दिएको १८७ रनको लक्ष्य कर्णालीले अन्तिम ओभरको एक बल बाँकी छँदा ७ विकेट गुमाएर पूरा गर्यो। कप्तान सोमपाल कामीको अविजित अर्धशतक र गुल्सन झासँगको उत्कृष्ट साझेदारी कर्णालीको जितमा निर्णायक बन्यो।
सोमपाल र गुल्सनको साझेदारीले दिलायो जित
कर्णालीको जितका नायक कप्तान सोमपाल कामी बने। उनले ३२ बलमा अविजित ६२ रन बनाउँदै टोलीलाई लक्ष्यसम्म पुर्याए। उनको इनिङ्समा ४ चौका र ३ छक्का समावेश थिए।
सुरुवाती ब्याटरहरू छिट्टै आउट भएपछि दबाबमा परेको कर्णालीलाई सोमपालले पवन सर्राफसँग मिलेर सम्हालेका थिए। छैटौँ विकेटका लागि सोमपाल र पवनबीच ६६ रनको साझेदारी भयो। पवनले २८ बलमा ३६ रन बनाए।
पवन आउट भएपछि पनि सोमपालले हार मानेनन्। उनले गुल्सन झासँग सातौँ विकेटका लागि अविजित ६४ रनको साझेदारी गर्दै टोलीलाई जित दिलाए। गुल्सनले २१ बलमा नटआउट २८ रन बनाए।
अन्तिम ओभरमा कर्णालीलाई जितका लागि ८ रन आवश्यक थियो। पहिलो बलमा सोमपालले एक रन लिए भने गुल्सनले दोस्रो बलमा दुई र तेस्रो बलमा एक रन जोडे। चौथो र पाँचौँ बलमा सोमपालले दुई-दुई रन लिएपछि कर्णालीले रोमाञ्चक जित सुनिश्चित गर्यो। यस क्रममा विराटनगरका लोकेश बमले गुल्सनको क्याच छुटाएका थिए।
कर्णालीको सुरुवात कमजोर
लक्ष्य पछ्याउने क्रममा कर्णालीले सुरुवाती पाँच विकेट कम योगफलमै गुमाएको थियो। मार्क वाटले एक, दीपक डुम्रेले २०, अक्बर अलीले एक र अरिफुल इस्लामले ३२ रन बनाए। हुसेन तलत भने खाता नखोली आउट भए।
बलिङतर्फ विराटनगरका एन्जेलो म्याथ्युजले तीन विकेट लिए। चरिथ असलंका, प्रतिश जिसी र कप्तान सन्दीप लामिछानेले एक-एक विकेट हात पारे। तर सोमपाल र गुल्सनको आक्रामक ब्याटिङ रोक्न विराटनगर असफल रह्यो।
लोकेश बमको उत्कृष्ट इनिङ्समा विराटनगरको बलियो योगफल
यसअघि त्रिवि क्रिकेट मैदानमा टस हारेर पहिले ब्याटिङ गरेको विराटनगर किंग्सले निर्धारित २० ओभरमा सात विकेट गुमाउँदै १८६ रन बनाएको थियो।
विराटनगरका ओपनर लोकेश बमले उत्कृष्ट प्रदर्शन गर्दै ५२ बलमा ८७ रन बनाए। उनले आफ्नो इनिङ्समा तीन चौका र नौ छक्का प्रहार गरे। उनी एनपीएलमा शतक बनाउने पहिलो नेपाली खेलाडी बन्ने अवसरको नजिक पुगे पनि सोमपाल कामीको बलमा आउट भए। शतक पूरा गर्न उनलाई १३ रन आवश्यक थियो।
लोकेशले चौथो विकेटका लागि एन्जेलो म्याथ्युजसँग ६७ रनको साझेदारी गरेका थिए। म्याथ्युजले २२ बलमा ३१ रन बनाए। आन्द्रे रसेलले १५ बलमा २७ रन जोड्दा बसिर अहमदले १३ रन बनाए। ओपनर इम्रान शेख पाँच, चरिथ असलंका तीन र शेहान जयसूर्या ११ रनमा आउट भए। सुजन थपलिया अविजित रहे।
कर्णालीका कप्तान सोमपाल कामीले बलिङमा पनि प्रभावशाली प्रदर्शन गरे। उनले चार ओभरमा ३३ रन खर्चेर चार विकेट लिए। लोकेश बम, आन्द्रे रसेल, एन्जेलो म्याथ्युज र चरिथ असलंकालाई आउट गर्दै उनले विराटनगरको रनगति रोक्ने प्रयास गरेका थिए। मार्क वाट र नन्दन यादवले एक-एक विकेट लिए।
एनपीएलमा शुक्रबार खेल नहुने
प्रतियोगिताको तालिकाअनुसार शुक्रबार कुनै पनि खेल राखिएको छैन।
