काठमाडौं: उपप्रधानमन्त्री एवं गृहमन्त्री नारायणकाजी श्रेष्ठले सरकार बनाउन भारतले सहयोग गरेको भन्ने कुरा सत्य नरहेको बताउनु भएको छ ।
आज पत्रकारसँग कुराकानी गर्दै उहाँले यस्तो बताउनु भएको हो । उहाँले बाहिर आएका समाचार हेर्दा पनि प्रधानमन्त्री बन्न भारत जानुपर्छ भन्ने नदेखिएको बताउदै नेपालको प्रधानमन्त्री नेपालको संसद्ले निर्वाचित गर्ने बताउनु भएको हो ।
जननिर्वाचित सरकार र जनताको शासन प्रणालीका निम्ति सबैभन्दा बढी सङ्घर्ष गर्ने नेताले यहाँको सरकार बनाउनका निमित्त विदेशको मुख ताक्ने वा विदेशतर्फ धाउने कुरा हुन नसक्ने उहाँको भनाई छ । यस विषयमा प्रधानमन्त्रीज्यूले आफ्नो धारणा सार्वजनिक गर्नु हुने उहाँले बताउनु भयो ।
फरक प्रसंगमा उहाँले सरकारले गरेका कामलाई सकारात्मकरूपमा लिनुपर्ने बताउनु भएको भएको छ । सरकारका कामलाई नकारात्मक दृष्टिले मात्रै हेर्न नहुने उहाँको भनाई छ ।
भूटानी शरणार्थी र ललिता निवास जग्गा प्रकरणमा प्रहरीले स्वच्छ र स्वतन्त्र अनुसन्धान गर्ने उहाँले बताउनु भयो । उहाँले भन्नु भयो, “स्वच्छ, स्वतन्त्र अनुसन्धानको आधारमा तथ्य र प्रमाणले जे देखाउँछ, त्यो विन्दुसम्म सरकार पुग्छ ।” यस विषयमा अरु ढङ्गले सोच्नुपर्ने आवश्यकता नरहेको उहाँको भनाई छ ।
