पोखरा : पोखरा अन्तर्राष्ट्रिय विमानस्थलबाट पहिलो पटक नियमित अन्तर्राष्ट्रिय व्यावसायिक उडान सुरु भएको छ। बजेट एयरलाइन्स 'फ्लाई दुबई'ले दुबई–पोखरा–दुबई रुटमा आफ्नो दैनिक उडान सेवा सुरु गरेसँगै पर्यटकीय नगरी पोखरा सिधै अन्तर्राष्ट्रिय उडान सञ्जालमा जोडिएको हो।
बुधबार साँझ ६:१५ बजे फ्लाई दुबईको जहाज पोखरामा अवतरण भई सोही साँझ यात्रु लिएर दुबईतर्फ प्रस्थान गरेको छ। दुबईलाई मुख्य ट्रान्जिट बनाएर युरोप, अमेरिका, अस्ट्रेलिया तथा अन्य गन्तव्यसम्म यात्रा गर्न सहज हुने भएपछि स्थानीय बासिन्दा र पर्यटन व्यवसायीहरूमा व्यापक उत्साह छाएको छ।
यसअघि पनि पोखराबाट केही अन्तर्राष्ट्रिय उडानहरू भएका थिए, तर तिनले निरन्तरता पाउन सकेका थिएनन् ।
-
हिमालयन एयरलाइन्स : सन् २०२५ मार्चदेखि २०२६ मार्च २३ सम्म साताको एक पटक ल्हासा–पोखरा रुटमा उडान सञ्चालन गरेको थियो। कुल १०४ मुभ्मेन्ट (५२ एराइभल र ५२ डिपार्चर) भएपछि यात्रु अभावका कारण सेवा स्थगित भयो।
-
सिचुवान एयरलाइन्स : छेन्दु–पोखरा रुटमा ६ महिनासम्म २४ वटा चार्टर उडान सञ्चालन गरे पनि यात्रु कमीकै कारण निरन्तर हुन सकेन।
-
अन्य : भुटान एयरलाइन्स र ड्रक एयरलाइन्सले भुटानबाट चार्टर उडान गरेका थिए भने भारततर्फ एउटा मेडिकल उडान भएको थियो।
अन्तर्राष्ट्रिय उडान आकर्षित गर्न सरकारले दिँदै आएको सहुलियतका कारण २०८५ भदौसम्म अन्तर्राष्ट्रिय उडानतर्फको शुल्क पूर्ण रूपमा छुट छ। जसले गर्दा हाल विमानस्थलको अन्तर्राष्ट्रिय आम्दानी शून्य छ।
विमानस्थल प्रमुख जगन्नाथ निरौलाका अनुसार आन्तरिक उडानको शुल्कबाट गत आर्थिक वर्ष २०८१/८२ मा रु. ३५ करोड आम्दानी भएको थियो भने त्यसअघिको वर्षमा जेन-जी आन्दोलन र हवाई इन्धनको मूल्यवृद्धिका कारण रु. ३४ करोड आम्दानी भएको थियो। पुरानो पोखरा विमानस्थल सञ्चालनमा रहँदा भने वार्षिक १० देखि ११ करोड रुपैयाँ आम्दानी हुने गरेको थियो।
नियमित उडान सुरु भएसँगै पर्यटन क्षेत्रका अगुवाहरूले यसलाई सकारात्मक कदमका रूपमा लिएका छन्।
-
हरि भुजेल (अध्यक्ष, पोखरा पर्यटन परिषद्) : "दुबईसँगको यो नियमित उडानले निरन्तरता पाउने र यसले पोखरामा विदेशी पर्यटकको आगमन बढाउनेमा हामी विश्वस्त छौँ।"
-
पोमनारायण श्रेष्ठ (पूर्वअध्यक्ष, पोखरा पर्यटन परिषद्) : "फ्लाई दुबई र इमिरेट्स Air बीचको रणनीतिक 'कोडसेयर' साझेदारीले गर्दा पोखराबाटै दुबई हुँदै संसारभरका १२० भन्दा बढी गन्तव्यमा जोडिन सहज हुनेछ।"
-
कृष्ण आचार्य (अध्यक्ष, टान गण्डकी) : "अन्नपूर्ण, धौलागिरि र मनास्लु जस्ता विश्वविख्यात पदयात्राको प्रवेशद्वार मानिने पोखरामा सिधा उडान हुनु पदयात्रा पर्यटनका लागि ठूलो राहत हो।"
-
लक्ष्मण सुवेदी (अध्यक्ष, होटल संघ नेपाल) & वसन्त गौतम (अध्यक्ष, रेवान पोखरा) : पोखरामा पर्यटकीय पूर्वाधारका लागि ३ अर्ब रुपैयाँभन्दा बढी लगानी भइसकेको अवस्थामा यस उडानले काठमाडौँको हवाई चाप घटाउनुका साथै समग्र गण्डकी प्रदेशकै आर्थिक गतिविधिलाई चलायमान बनाउने बताउँछन्।
