काठमाडौँ : ग्लोबल आइएमई बैंक लिमिटेडले आफ्ना सेयरधनीहरूका लागि प्रस्ताव गरिएको लाभांश पारित गर्न २०औँ वार्षिक साधारणसभा आह्वान गरेको छ। बैंक सञ्चालक समितिको बैठकको निर्णयअनुसार उक्त साधारणसभा आगामी असोज १६ गते (शुक्रबार) काठमाडौंको भृकुटीमण्डपस्थित नेपाल पुलिस क्लबमा बिहान ९:०० बजेदेखि सुरु हुनेछ।
साधारणसभाका मुख्य एजेन्डा तथा प्रस्तावहरू:
-
लाभांश अनुमोदन : सभाले गत आर्थिक वर्ष २०८२/८३ को मुनाफाबाट प्रस्ताव गरिएको कुल १० प्रतिशत लाभांश पारित गर्नेछ। जसमा ४ प्रतिशत बोनस सेयर र ६ प्रतिशत नगद लाभांश (करसहित) रहेका छन्।
-
पुँजी वृद्धि तथा नियमावली संशोधन : बोनस सेयर जारी गरेपछि सोही बराबर चुक्तापुँजी वृद्धि गर्न बैंकको प्रबन्धपत्र तथा नियमावलीमा आवश्यक संशोधन गर्ने विशेष प्रस्ताव पारित गरिनेछ।
-
वित्तीय विवरण तथा प्रतिवेदन पारित : बैंकको वार्षिक तथा वित्तीय प्रतिवेदन स्वीकृत गर्नुका साथै सहायक कम्पनीहरू (ग्लोबल आइएमई क्यापिटल, ग्लोबल आइएमई लघुवित्त र ग्लोबल आइएमई सेक्युरिटिज) को एकीकृत वित्तीय विवरण पारित गरिनेछ।
-
लेखापरीक्षक नियुक्ति: चालु आर्थिक वर्षका लागि बाह्य लेखापरीक्षकको नियुक्ति तथा निजको पारिश्रमिक निर्धारणसम्बन्धी प्रस्ताव अनुमोदन गरिनेछ।
