काठमाडौँ : साहस ऊर्जा लिमिटेडले आफ्ना सेयरधनीहरूलाई कुल २२.१०५३ प्रतिशत लाभांश वितरण गर्ने घोषणा गरेको छ। कम्पनीको सञ्चालक समितिको सोमबार साँझ बसेको बैठकले चुक्ता पूँजीको २१ प्रतिशत बोनस सेयर र सो बोनसमा लाग्ने कर प्रयोजनका लागि १.१०५३ प्रतिशत नगद लाभांश दिने निर्णय गरेको हो।
कम्पनीका अनुसार प्रस्तावित लाभांश विद्युत् नियमन आयोगको स्वीकृति र आगामी वार्षिक साधारणसभाबाट पारित भएपछि मात्र वितरण गरिनेछ।
त्यसैगरी, बोनस सेयर वितरणपछि कम्पनीको चुक्ता पूँजी ४ अर्ब ५७ करोड ३८ लाख रुपैयाँ पुग्नेछ। सो पूँजीका आधारमा कम्पनीले १ बराबर १ अनुपातमा हकप्रद सेयर जारी गर्ने तयारी गरेको छ।
