काठमाडौँ : नेपाल आयल निगमले डिजेल र मट्टीतेलको मूल्यमा कटौती गर्दै मंगलबारदेखि नयाँ मूल्य लागू गर्ने भएको छ। भारतबाट आयात हुने इन्धनको लागत घटेसँगै निगमले प्रतिलिटर २ रुपैयाँले डिजेल र मट्टीतेलको मूल्य घटाएको हो।
यससँगै अब काठमाडौं उपत्यकामा डिजेल र मट्टीतेलको नयाँ मूल्य प्रतिलिटर १ सय ४९ रुपैयाँ कायम भएको छ जुन यसअघि १ सय ५१ रुपैयाँ रहेको थियो। साथै, पेट्रोल र एलपि ग्यासको खुद्रा बिक्री मूल्य यथावत् राखिएको निगमले जनाएको छ।
निगमले हवाई इन्धनको मूल्यमा पनि समायोजन गरेको छ। आन्तरिक उडानका लागि हवाई इन्धनको मूल्य प्रतिलिटर ७ रुपैयाँले घटाइएको छ भने अन्तर्राष्ट्रिय उडानतर्फ प्रतिकिलोलिटर अमेरिकी डलर ५१ ले घटाइएको छ।
