काठमाडौँ : नेपालमा जीवन बीमा पोलिसी सरेण्डर गर्ने बीमितहरूको संख्या बढ्दै गएको छ। चालु आर्थिक वर्षको कात्तिक मसान्तसम्म करिब पाँच अर्ब रुपैयाँ बराबरका पोलिसी सरेण्डर भएका छन्। नेपाल बीमा प्राधिकरणले सार्वजनिक गरेको तथ्यांक अनुसार १४ वटा जीवन बीमा कम्पनीहरूमार्फत ३५ हजारभन्दा बढी बीमितहरूले पोलिसी सरेण्डर गरेका हुन्।

सबैभन्दा धेरै सरेण्डर एलआइसी नेपाल : चार महिनाको अवधिमा एलआइसी नेपालबाट सबैभन्दा धेरै १० हजार ४८ पोलिसी सरेण्डर भएका छन्। यसबाट कम्पनीले १ अर्ब ५७ करोड रुपैयाँ बराबरको पोलिसी सरेण्डर गर्नुपरेको छ।

त्यसपछि नेपाल लाइफ इन्स्योरेन्स दोस्रो स्थानमा रहेको छ। जहाँ ८ हजार ४ सय ८ पोलिसी सरेण्डर गरिँदा १ अर्ब ३७ करोड रुपैयाँ बराबरको रकम फिर्ता गरिएको छ।