भद्रपुर : मेची भन्सार कार्यालय काँकडभिट्टाले चालु आर्थिक वर्षको १० महिनामा रु ११ अर्ब ५९ करोड ३७ लाख ३४ हजार राजस्व सङ्कलन गरेको छ। गत आर्थिक वर्षको तुलनामा यसवर्ष रु १ करोड ८७ लाख १३ हजार कम राजस्व सङ्कलन भएको हो।
मेची भन्सार कार्यालय काँकडभिट्टाका सूचना अधिकारी गणपति कँडेलका अनुसार चालु आवको वैशाखसम्म गत आवको तुलनामा चियामा १६.१२ र अलैँचीमा ४.६५ प्रतिशत निर्यात घटेको छ। उहाँले भन्नुभयो “पछिल्लो समय भेनियस सिटसहित फलामको पाता, प्लाइउड, छुर्पी, अम्रिसो, अदुवालगायतका निर्यात बढेको छ”।
भन्सार कार्यालय काँकडभिट्टाका अनुसार पेट्रोल, फलामका सामग्री र फलफूलको जुसलगायतको आयातमा सामान्य वृद्धि भए पनि डिजेल, तरकारी, जुट, जिप्सम, कपडा एलपिजीलयायतका सामग्रीको आयात गत आवको पहिलो १० महिनाको तुलनामा घटेको हो।
भन्सार कार्यालय काँकडभिट्टामा चालु आवको वैशाखसम्ममा गत आवको तुलनामा आयात ८.२४ प्रतिशतले घटेको हो। निर्यात ११.३८ प्रतिशतले बढेको सूचना अधिकारी कँडेलले जानकारी दिनुभयो। उहाँका अनुसार पछिल्लो १० महिनामा रु ३६ अर्ब ५३ करोड ७० लाख ३८ हजार बराबरका वस्तु आयात भएको छ भने २० अर्ब २६ हरोड ७८ लाख १८ हजार मूल्य बराबरका सामग्री निर्यात भएको छ।
