काठमाडौँ : टी- २० त्रिकोणात्मक सिरिजको दोस्रो खेलमा आज नेपाल र नेदरल्यान्ड्स खेल्दै छन्। आज नेदरल्यान्ड्सविरुद्ध मैदान उत्रिँदा नेपाल पहिलो जितको खोजीमा हुनेछ। आज त्रिवि मैदान कीर्तिपुरमा नेपाल र नेदरल्यान्ड्स बिचको खेल ११:३० बजेदेखि सुरु हुनेछ। हिजो भएको पहिलो खेलमा नेपाल नामिबियासँग २० रनले पराजित भएको थियो।
आइसीसी क्रिकेट विश्वकप लिग–२ को समापनपछि नेपाल, नामिबिया र नेदरल्यान्ड्सले टी– २० शृङ्खला खेल्न लागेका हुन्। नेपालले जुनमा हुने टी-२० विश्वकपको लामो तयारीको सुरुवातको रूपमा यो सिरिजलाई लिएको छ। नामिबिया र नेदरल्यान्ड्स पनि विश्वकप खेल्दै छन् भने नेपाल र नेदरल्यान्ड्स एकै समूहमा छन्।
नेपाली टिममा रोहितकुमार पौडेल (कप्तान), आसिफ सेख, कुशल भुर्तेल, कुशल मल्ल, दीपेन्द्रसिंह ऐरी, ललितनारायण राजवंशी, करण केसी, गुल्सन झा, सोमपाल कामी, प्रतिश जिसी, सन्दीप जोरा, विनोद भण्डारी, विवेक यादव, अनिल साह, राशिद खान, सागर ढकाल, आरिफ सेख, अभिनाश बोहरा रहेका छन्।
आजको खेलपछि नेपालले अब १९ गते नेदरल्यान्ड्ससँग खेल्नेछ। शृङ्खलाको लिग चरणबाट शीर्ष दुई टोली उपाधिका लागि फाइनलमा भिड्नेछन् भने फाइनल खेल फागुन २२ गते हुनेछ।
