काठमाडौं : अण्डाको मूल्य पुनः वृद्धि भएको छ। नेपाल लेयर्स कुखुरा पालक संघले अण्डाको बिक्री मूल्यमा १५ रुपैयाँ थप गरेको छ।
संघको पुस ४ गते बसेको बैठकले नयाँ मूल्य तोकेको हो। यससँगै मध्यम किसिमको अण्डाको प्रतीक्रेट मूल्य ४ सय ८५ रुपैयाँ र ठुलो अण्डाको प्रतीक्रेट मूल्य ५ सय रुपैयाँ तोकिएको संघका सचिव मदन पोखरेलले जानकारी दिए।
गत मंसिर २७ गतेको बैठकले मध्यम अण्डाको प्रतीक्रेट ४ सय ७० रुपैयाँ र ठुलो अण्डाको प्रतीक्रेट ४ सय ८५ रुपैयाँ तोकेको थियो। एक सातामै पुनः मूल्यवृद्धि गरिएको हो।
संघका अनुसार चितवनलाई आधार मान्दै पुस ५ गतेदेखि नयाँ बिक्री मूल्य लागू हुनेछ। संघले व्यवसायीलाई तोकिएको मूल्यमा कारोबार गर्न अनुरोध गरेको छ।
चितवनबाट लोड भएर देशभरका अण्डा बिक्री केन्द्रमा पुर्याउँदा भाडा, कार्टुन र क्रेटसहित प्रतिपेटी १ सय ४० रुपैयाँ लाग्ने संघले जानकारी दिएको छ।
