काठमाडौं : राहदानी विभागको प्रणालीमा भाइरस संक्रमण भएको पुष्टि भएको छ। विभागले आइतबार जारी गरेको सूचनामा राहदानी आवेदन प्रणालीमा मालवेयर पसेको जानकारी दिएको छ।
भाइरस संक्रमणको प्रारम्भिक आशङ्काका कारण चार दिनदेखि विभागको सिस्टम बन्द गरिएको छ। यसबाट राहदानी सेवा पूर्ण रूपमा अवरुद्ध भएको छ। विभागले सेवा पुनः सञ्चालनमा आउन अझै दुई हप्तासम्म लाग्न सक्ने बताएको छ।
यसअघि विभागले केवल सेवा अवरुद्ध भएको जानकारी गराएको थियो तर कारण खुलाइएको थिएन। अद्यावधिक सूचनामा भने भाइरस संक्रमण रोक्न र सुरक्षा सुनिश्चित गर्न सिस्टम बन्द गरिएको उल्लेख छ।
“राहदानी आवेदन प्रणालीसँग सम्बन्धित केही कम्प्युटरहरूमा भाइरस पसेको प्रारम्भिक निष्कर्ष निकालिएको छ। यसको फैलावट रोक्न पर्याप्त सतर्कता अपनाउनु परेकाले सबै सेवाहरू अवरुद्ध गर्नुपरेको हो।” विभागले सूचनामा भनेको छ।
सेवा आंशिक रूपमा सञ्चालनमा
विभागले अत्यावश्यक सेवाग्राहीका लागि आंशिक रूपमा सेवा सुरु गरेको जनाएको छ। यसअघि नै फाराम भरेका सेवाग्राहीलाई सेवा दिन सुरु भइसकेको छ भने नयाँ फाराम भर्नका लागि बुकिङ प्रक्रिया एक/दुई दिनभित्र खोलिने बताइएको छ।
सुरक्षा प्राथमिकता
भाइरस संक्रमण देखिएपछि विभागले सुरक्षा संवेदनशीलतालाई विशेष प्राथमिकता दिएको छ। आवेदकहरूको तथ्याङ्क पूर्ण रूपमा सुरक्षित रहेको र यो अवस्थाका लागि धैर्यधारण गर्न अनुरोध गरिएको छ।
सम्पूर्ण सेवा पुनः सञ्चालन
सबै सेवा पूर्ण रूपमा सञ्चालनमा आउन अझै दुई हप्तासम्म लाग्ने अनुमान गरिएको छ। यस अवधिमा जिल्ला/इलाका प्रशासन कार्यालय र विदेशस्थित नियोगहरूमार्फत सेवा क्रमशः उपलब्ध गराउने व्यवस्था गरिएको छ।
सेवाग्राहीका लागि अनुरोध
विभागले सेवाग्राहीहरूलाई धैर्य गर्न र आवश्यक सूचनाका लागि विभागको वेबसाइट वा सूचना माध्यमहरूमा ध्यान दिन आग्रह गरेको छ।
