काठमाडौं : रिलायन्स स्पिनिङ मिल्स लिमिटेडले चालु आर्थिक वर्षको पहिलो त्रैमासमा साढे ८ करोडभन्दा बढी नाफा कमाउन सफल भएको छ। कम्पनीले सार्वजनिक गरेको वित्तीय विवरणअनुसार, नाफा ३ करोड ६३ लाख रुपैयाँले बढेर ८ करोड ६७ लाख ७९ हजार रुपैयाँ पुगेको छ। गत आर्थिक वर्षको अन्त्यसम्म ५ करोड ३ लाख ८३ हजार नाफा कमाएको कम्पनीले यस अवधिमा २ अर्ब ३४ करोड ५८ लाख रुपैयाँ सञ्चालन आम्दानी गरेको छ।
वित्तीय अवस्था सुधार
कम्पनीले असोज मसान्तसम्म २८ करोड ९४ लाख रुपैयाँ कुल नाफा कमाएको छ। अन्य आम्दानी १ करोड १३ लाख ५५ हजार रुपैयाँ रहेको छ भने सञ्चालन मुनाफा २० करोड ३१ लाख ३० हजार रुपैयाँ रहेको छ। तर, वित्तीय खर्च १० करोड ४३ लाख ७४ हजार रुपैयाँ पुगेको छ।
रिलायन्स स्पिनिङ मिल्सको १ अर्ब ७० करोड ७३ लाख ४० हजार रुपैयाँ चुक्ता पुँजी रहेको छ, जबकि अन्य इक्विटी ५ अर्ब ४३ करोड २४ लाख ७५ हजार रुपैयाँ छ।
प्रतिशेयर आम्दानीमा सुधार
विद्युत् समस्या र प्राधिकरणसँगको विवादले गत वर्ष प्रभावित भएको कम्पनीको वित्तीय अवस्था यस वर्ष सुधारिएको छ। गत वर्ष २.९७ रुपैयाँमा झरेको प्रतिशेयर आम्दानी (ईपीएस) यस वर्षको पहिलो त्रैमासमा १९.९५ रुपैयाँमा सुधार भएको छ।
अन्तर्राष्ट्रिय व्यापार र विवाद
देशको प्रमुख निर्यातमूलक उद्योगमध्ये एक रिलायन्स स्पिनिङ मिल्सले भारतदेखि टर्कीसम्म वार्षिक अर्बौँ रुपैयाँको धागो निर्यात गर्दै उत्कृष्ट निर्यातकर्ताका रूपमा पटक-पटक सम्मान प्राप्त गरेको छ। तर, विद्युत् महसुल विवाद र अन्य उजुरीका कारण यसले केही समय अन्तर्राष्ट्रिय छविमा असर खेप्नुपरेको थियो।
हाल प्रिमियम मूल्यमा आइपिओ निष्कासन गर्ने प्रक्रियामा विवाद समाधान भएपछि उच्च अदालत पाटन, नेपाल प्रहरीको केन्द्रीय अनुसन्धान ब्युरो (सीआईबी) र नेपाल धितोपत्र बोर्डबाट ‘क्लिन चिट’ पाएको कम्पनीले बुक बिल्डिङ विधिबाट आइपिओ निष्कासनको तयारी गरिरहेको छ।
रोजगारी र विस्तार योजना
तीन दशकदेखि सञ्चालनमा रहेको रिलायन्स स्पिनिङ मिल्सले हाल साढे चार हजार व्यक्तिलाई प्रत्यक्ष रोजगारी दिएको छ। लगातार सीआईपी अवार्ड प्राप्त गर्दै आएको यस कम्पनीले थप नयाँ उद्योग स्थापनाको योजना बनाएको छ भने आवश्यक लगानी स्वदेशमै जुटाउने लक्ष्यका साथ अघि बढिरहेको छ।
