काठमाडौँ : खाद्य व्यवस्था तथा व्यापार कम्पनी लिमिटेडले आजदेखि दसैँको अवसरमा उपभोक्तालाई सुपथ मूल्यमा खसी बोका र च्याङ्ग्राको बिक्री खुला गरेको छ। यस वर्ष कम्पनीले खसी बोकाको मूल्य प्रतिकेजी ६ सय ७० रुपैयाँ तोकी १० रुपैयाँ छुटसहित ६ सय ६० रुपैयाँमा बिक्री सुरु गरेको छ भने च्याङ्ग्राको मूल्य प्रतिकेजी १ हजार २ सय ३० रुपैयाँ तोकी १ हजार २ सय २० रुपैयाँमा बिक्री गरेको छ।
कम्पनीका सूचना अधिकारी शर्मिला न्यौपानेले २ सय ८ खसी बोका हेटौँडाबाट पहिलो लटमा आइपुगेको र ३ सय च्याङ्ग्रा मुस्ताङबाट ल्याएको जानकारी दिएकी छिन्। यस वर्ष दसैँमा कम्पनीले १ हजार ५ सय खसी बोका र ३ सय च्याङ्ग्रा गरी कुल १ हजार ८ सय बेच्ने लक्ष्य राखेको छ।
निजी व्यवसायीहरूले भने घटस्थापनाको दिनदेखि नै खसी बोका बिक्री सुरु गरिसकेका छन्। किनकि दसैँमा खसी बोकाको माग अत्यधिक हुने गर्छ।
