नवलपुर : नवलपरासी (बर्दघाट–सुस्तापूर्व)मा चालु आर्थिक वर्षको १० महिनामा करिब रु २१ अर्ब राजस्व सङ्कलन भएको छ।
कोष तथा लेखा नियन्त्रक कार्यालयका अनुसार जिल्लामा रहेका सङ्घीय सरकार र प्रदेश सरकार मातहतका कार्यालयले १० महिनाको अवधिमा रु २० अर्ब ९५ करोड ८७ लाख ६४ हजार ४ सय ५० राजस्व सङ्कलन गरेका हुन्।
कोष तथा लेखा नियन्त्रक कार्यालय नवलपुरका सूचना अधिकारी कोष नियन्त्रक जीतनारायण महतोले जिल्लामा सङ्कलन भएको राजस्वमध्ये सङ्घीय सरकारलाई जाने राजस्वतर्फ रु २० अर्ब ५० करोड ६९ लाख ५५ हजार ७ सय ७९ एवं गण्डकी प्रदेश सरकारको खातामा दाखिला हुने रु ४५ करोड १८ लाख ८ हजार ६ सय ७९ सङ्कलन भएको जानकारी दिनुभयो।
आन्तरिक राजस्व कार्यालय कावासोतीले रु २० अर्ब ३३ करोड ८० लाख ९७ हजार ७ सय ३२ राजस्व सङ्कलन गरेको महतोले जानकारी दिनुभयो।
यसैगरी, सङ्घीय सरकारलाई जाने राजस्वतर्फ जिल्ला प्रशासन कार्यालय नवलपुरले रु ८ करोड ३९ लाख ५१ हजार १ सय २०, जिल्ला ट्राफिक प्रहरी कार्यालय नवलपुरले रु २ करोड ४२ लाख १ हजार ७ सय ११, जिल्ला अदालत नवलपुरले रु १ करोड ५७ लाख ७७ हजार ७ सय ९९, त्रिवेणी भन्सार कार्यालयले रु १ करोड ५८ लाख ५१ हजार ६ सय ४७ राजस्व सङ्कलन गरेका महतोले बताउनुभयो।
जिल्लास्थित गण्डकी प्रदेश सरकार मातहतका कार्यालयमध्ये यस वर्षको वैशाख मसान्तसम्ममा यातायात व्यवस्था कार्यालयले रु २५ करोड ६९ लाख ३९ हजार २ सय २७, मालपोत कार्यालयले रु १२ करोड ९१ लाख ६१ हजार ६ सय २७, डिभिजन वन कार्यालयले रु ४ करोड ५२ लाख ८१ हजार आठ सय ५४ राजस्व सङ्कलन गरेका छन्।
