डडेल्धुरा : डडेल्धुराको अमरगढी नगरपालिका–५ बागबजारमा रहेको सुलभ फेन्सी स्टोरमा गएराति आगलागी हुँदा रु २ करोड ८६ लाख बराबरको क्षति भएको छ। स्टोरमा सल्केको आगो अन्य ३ वटा पसलमा फैलिएको थियो।
विद्युत् ‘सर्ट’ हुँदा फैलिएको आगोबाट सुलभ फेन्सीको रु १ करोड २० लाख, कैलपाल मेडिकलको रु ८० लाख र शिशिर फेन्सीका रु ८० लाख बराबरको सामान नष्ट भएको प्रहरीले जानकारी दिनुभयो।
अमरगढी नगरपालिकाको वारुणयन्त्र, नेपाल प्रहरी, सशस्त्र, नेपाली सेना र स्थानीयले करिब १ घन्टापछि आगो नियन्त्रणमा लिएका थिए। सदरमुकामा यस किसिमका आगलागीका घटना भइरहन्छन्। हालसम्म सदरमुकाम बागबजारमा मात्रै तीनपटक आगलागी भएको छ।
यसैबीच, धनकुटा नगरपालिका–५ कर्मिटार बस्ने विश्वबन्धु थापाको गोठ र सोही स्थानका काजीनारायण खड्काको घरमा आज आगलागी हुँदा रु ११ लाख बराबरको धनमाल नष्ट भएको केन्द्रीय प्रहरी समाचार कक्षले जनाएको छ। नेपाल प्रहरी, सशस्त्र प्रहरी बल, स्थानीय बासिन्दा र धनकुटा नगरपालिकाको वारुणयन्त्रको सहयोगमा आगो निभाइएको थियो।
