काठमाडौँ : सिद्धार्थ बैंक लिमिटेडले आफ्नो २५ औँ वार्षिक साधारणसभा आह्वान गरेको छ। बैंक सञ्चालक समितिको हालै बसेको बैठकले आगामी असोज २८ गते काठमाडौंको भद्रकालीस्थित आर्मी अफिसर्स क्लबमा बिहान ९ बजेदेखि सभा आयोजना गर्ने निर्णय गरेको हो।
उक्त सभामा बैंकले गत आर्थिक वर्ष २०८२/८३ को मुनाफाबाट आफ्ना शेयरधनीहरूलाई हाल कायम चुक्तापुँजी १४ अर्ब ७९ करोड ४४ लाख ७९ हजार १ सय ९५ रुपैयाँको कुल २० प्रतिशत लाभांश वितरण गर्ने प्रस्ताव पेस गर्दै छ। यसअन्तर्गत १० प्रतिशत बोनस शेयर (१ अर्ब ४७ करोड ९४ लाख ४७ हजार ९ सय २० रुपैयाँ) र १० प्रतिशत नगद लाभांश (करसहित १ अर्ब ४७ करोड ९४ लाख ४७ हजार ९ सय २० रुपैयाँ) पारित गरिनेछ।
यसका साथै, बैंकका अग्राधिकार शेयरधनीहरूका लागि ८.५ प्रतिशतका दरले हुन आउने १० करोड ७५ लाख ८९ हजार ४१ रुपैयाँ बराबरको नगद लाभांश (करसहित) दिने प्रस्ताव पनि सभाले अनुमोदन गर्नेछ।
बोनस शेयर जारी गरेपछि बैंकको चुक्तापुँजी वृद्धि हुने भएकाले सोहीअनुसार नियमावली तथा प्रबन्धपत्रमा आवश्यक संशोधन गर्ने र नियामक निकायको निर्देशनबमोजिम थप फेरबदल गर्न सञ्चालक समितिलाई पूर्ण अख्तियारी दिने विशेष प्रस्ताव पारित गरिनेछ।
सभाले गत आर्थिक वर्षको वित्तीय विवरण तथा लेखापरीक्षकको प्रतिवेदन स्वीकृत गर्नुका साथै चालु आर्थिक वर्ष २०८३/८४ का लागि नयाँ लेखापरीक्षक नियुक्ति र निजको पारिश्रमिक तोक्ने एजेन्डामाथि छलफल गरी निर्णय लिनेछ।
साधारणसभा र लाभांश प्रयोजनका लागि बैंकले असोज १६ गते ‘बुक क्लोज’ गर्ने तय गरेको छ। तसर्थ, असोज १५ गतेसम्म नेप्सेमा कारोबार भई कायम रहेका शेयरधनीहरू मात्रै यस लाभांश प्राप्त गर्न र सभामा सहभागी हुन योग्य हुनेछन्।
