काठमाडौँ : चालु आर्थिक वर्ष २०८३/८४ को सुरुआती दुई महिना (साउन र भदौ) मा वाणिज्य बैंकहरूको कर्जा प्रवाहमा सकारात्मक सुधार देखिएको छ। यस अवधिमा सञ्चालनमा रहेका २० वटा वाणिज्य बैंकहरूले कुल ६० अर्ब ९७ करोड रुपैयाँ कर्जा विस्तार गरेका छन्।
नेपाल राष्ट्र बैंकको तथ्यांक अनुसार असार मसान्तमा बैंकहरूको कुल कर्जा लगानी ५२ खर्ब ८९ अर्ब ६८ करोड रुपैयाँ रहेकोमा भदौ मसान्तसम्म आइपुग्दा १.१५ प्रतिशतले बढेर ५३ खर्ब ५० अर्ब ६५ करोड रुपैयाँ पुगेको छ।
बजारमा नयाँ दीर्घकालीन आयोजना वा ठूला परियोजनाबाट कर्जाको माग नआए पनि आसन्न चाडपर्वलाई लक्षित गरी उपभोग्य वस्तु आयातका लागि प्रतितपत्र (एलसी) खुल्ने क्रम बढेकाले कर्जा प्रवाहमा सुधार आएको बैंकरहरू बताउँछन्।
नेपाल बैंकर्स संघका अध्यक्ष सन्तोष कोइरालाका अनुसार चाडपर्व नजिकिएसँगै बजारमा व्यापारिक गतिविधि र उपभोग्य सामानको आयात बढेकाले अल्पकालीन कर्जाको माग बढेको हो। साथै, पहिले नै प्रतिबद्धता जनाइएका कर्जाहरू भुक्तानी हुँदा पनि समग्र कर्जा विस्तारमा सहयोग पुगेको छ।
कर्जा विस्तारमा ग्लोबल आईएमई अगाडि, ८ बैंकको भने घट्यो
समीक्षा अवधिमा सबैभन्दा धेरै कर्जा विस्तार गर्नेमा ग्लोबल आईएमई बैंक पहिलो स्थानमा छ। बैंकले दुई महिनामा २० अर्ब १ करोड रुपैयाँ कर्जा बढाएर कुल लगानी ४ खर्ब ९६ अर्ब ८५ करोड रुपैयाँ पुर्याएको छ। त्यस्तै, दोस्रो धेरै कर्जा बढाउनेमा एभरेष्ट बैंक (१२ अर्ब ८८ करोड) र तेस्रो स्थानमा लक्ष्मी सनराइज बैंक (१० अर्ब ३१ करोड) रहेका छन्। अन्य बैंकहरूमा :
-
कुमारी बैंक: ७ अर्ब ६५ करोड
-
नबिल बैंक: ७ अर्ब ६ करोड
-
सिद्धार्थ बैंक: ४ अर्ब ८० करोड
-
माछापुच्छ्रे बैंक: ४ अर्ब ७४ करोड
-
एनएमबि बैंक: ४ अर्ब २९ करोड
