काठमाडौँ : आज बुधबारको कारोबार दिन नेप्से परिसूचक सामान्य अंक घटेर बन्द भएको छ। हिजो मंगलबार सामान्य अंक बढेको नेप्से आज १.६४ अंकले घटेर २७११.२२ विन्दुमा पुगेको छ। यद्यपि सेन्सेटिभ इण्डेक्स ०.८० अंकले बढेको छ भने फ्लोट इण्डेक्स र सेन्सेटिभ फ्लोट इण्डेक्समा पनि सानो वृद्धि देखिएको छ।
यस्तै, आज कारोबार रकमका आधारमा सोलु हाइड्रोपावर शीर्ष स्थानमा २२ करोड ११ लाख रुपैयाँबराबरको कारोबार भएको छ। त्यसपछि रिलायन्स स्पिनिङ्ग मिल्समा १६ करोड रुपैयाँभन्दा बढी तथा नेशनल हाइड्रोपावरमा करिब १५ करोड रुपैयाँको कारोबार भएको छ।
यसगरी, आज १३ उपसमूहमध्ये ८ उपसमूहको परिसूचक बढेको छ भने ५ उपसमूह घटेका छन्। बैंकिङ्ग, वित्त, होटल तथा पर्यटन, लगानी, लघुवित्त, म्युचुअल फण्ड, निर्जीवन बीमा र अन्य उपसमूह बढेका छन् भने विकास बैंक, जलविद्युत, जीवन बीमा, उत्पादन तथा प्रशोधन र व्यापार उपसमूह घटेका छन्।
यस्तै, कम्पनीहरूको मूल्यमा उल्लेखनीय उतारचढाव देखिएको छ। आज फरवार्ड माइक्रोफाइनान्स लघुवित्त वित्तीय संस्थाको शेयरमूल्य १३.७४ प्रतिशतले बढ्दै सर्वाधिक वृद्धि भएको छ भने अप्पर लोहोरे खोला हाइड्रोपावर करिब ६ प्रतिशतले बढेको छ तथा एनआईसी एशियन ग्रोथ फण्ड २ को इकाईमूल्य ५ प्रतिशतभन्दा बढीले बढेको छ तर भगवती हाइड्रोपावर डेभलपमेन्ट कम्पनीको शेयरमूल्य ८.९० प्रतिशतले घट्दै सर्वाधिक गिरावटमा परेको छ।
यसगरी, आज कुल कारोबार रकम पनि घटेको छ। हिजो मंगलबार ३ अर्ब ४३ करोड रुपैयाँबराबरको कारोबार भएकोमा आज बुधबार ३ सय ३६ कम्पनीको ४७ हजार ८ सय ४१ पटकको कारोबारमार्फत ३ अर्ब १९ करोड ७७ लाख रुपैयाँबराबरको ७१ लाख ३१ हजार कित्ता शेयर खरिदबिक्री भएको छ।
