काठमाडौँ : नेपाल पत्रकार महासङ्घको आगामी २८ गते हुने महाधिवेशनका लागि नेतृत्व बाँडफाँडका सम्बन्धमा प्रेस चौतारी र प्रेस युनियनबीच सहमति भएको छ।
गएराति दुई पक्षका नेताहरूबीच भएको छलफलमा महासङ्घको १३ सदस्यीय पदाधिकारीमा चौतारीले अध्यक्षसहित ५ पद लिने र युनियनले ८ पदमा उम्मेदवारी दिने सहमति भएको हो।
जिल्ला नेतृत्वमा पनि बाँडफाँड
जिल्ला अध्यक्षतर्फ चौतारीले ३२ र युनियनले ४२ पद लिने सहमति भएको छ। प्रेस चौतारीका उपाध्यक्ष राजेश राईका अनुसार चौतारीले केन्द्रीय अध्यक्ष, महिला उपाध्यक्ष, आदिवासी जनजाति सचिव, कोषाध्यक्ष र लेखा संयोजकका साथै २२ सदस्यीय पदमा प्रतिनिधित्व गर्नेछ। बाँकी पदाधिकारीमा युनियनले उम्मेदवारी दिने सहमति भएको छ।
प्रदेश नेतृत्वको बाँडफाँड
प्रदेश स्तरमा कोशी, मधेस, कर्णाली र उपत्यकाका अध्यक्ष चौतारीले लिनेछन् भने बागमती, गण्डकी, लुम्बिनी, सुदूरपश्चिम, एसोसियट र प्रतिष्ठानका अध्यक्ष युनियनले लिने सहमति भएको छ।
महाधिवेशनका लागि शुक्रबार मनोनयन दर्ता हुने कार्यक्रम रहेको छ।
