काठमाडौं : अमेरिकाको एआई चिप उत्पादन गर्ने कम्पनी एनभिडिया, अहिले चर्चाको शिखरमा पुगेको छ। एप्पललाई पछाडि पार्दै यो कम्पनीले विश्वको सबैभन्दा मूल्यवान कम्पनीको स्थान हासिल गरेको छ। यसको बजार पुँजीकरण ३.६४८ ट्रिलियन डलरमा पुगेको छ, जुन विश्वका थुप्रै देशहरूको कुल अर्थतन्त्रभन्दा पनि ठूलो हो।
पछिल्लो वर्षमा एनभिडियाको बजार मूल्य २.४ ट्रिलियन डलरले बढेको छ। यसको शेयरभाउमा २५ वर्षमा २ लाख ५० हजार प्रतिशतको वृद्धि भएको छ। कम्पनीका संस्थापक र सीईओ जेन्सेन हुआङ विश्वका ११ औं धनी व्यक्तिहरूमा पर्दछन्। उनको सम्पत्ति यस वर्ष ८२.८ अर्ब डलरले बढेर १ सय २७ अर्ब डलर पुगेको छ।
जेन्सेन हुआङको जीवन यात्रा प्रेरणादायी छ। ताइवानमा जन्मिएका हुआङको बाल्यकाल थाइल्यान्डमा बित्यो र सन् १९७३ मा उनी अमेरिकामा बसाइँ सरे। सन् १९९३ मा उनले एनभिडियाको स्थापना गरे र सुरुमा भिडियो गेमका लागि ग्राफिक्स चिप्स निर्माणमा केन्द्रित रहे।
कम्पनी सफल भएसँगै हुआङले आफ्नै हातमा एनभिडियाको लोगोको ट्याटु खोपेका थिए। अहिले उनको एनभिडियामा ३.५ प्रतिशत शेयर रहेको छ।
कोरोना महामारीको समयमा एनभिडिया तीव्र प्रगतिमा अगाडि बढ्यो। क्रिप्टो बजारको चिप्सको मागले कम्पनीलाई थप लाभ पुग्यो। यद्यपि, यसपछि केही समय कम्पनीको शेयर मूल्य घटेको थियो। तर, अहिले एआई क्षेत्रमा बढ्दो प्रवृत्तिले पुन: एनभिडियाको बजारमा पकड बलियो बनाएको छ।
आजको एआई युगमा एनभिडियाको चिप्सको माग विश्वभरि बढ्दो छ। माइक्रोसफ्ट र गुगलजस्ता कम्पनीहरूले बढीभन्दा बढी एनभिडियाका चिप्स प्रयोग गरिरहेका छन्। चीनका ठूला कम्पनीहरू जस्तै टेन्सेन्ट र अलिबाबा पनि एनभिडियाबाट चिप्स खरिदमा आकर्षित भइरहेका छन्। यसरी एआई र च्याटबट प्रविधिको प्रगतिसँगै एनभिडियाको भविष्य अझ उज्ज्वल देखिन्छ।
हुआङको कार्यसमर्पण अविस्मरणीय छ। बिहान ६ बजे आफ्नो दिनको सुरुवात गर्ने उनी दैनिक १४ घण्टा काम गर्छन् र बिदाको दिन पनि कार्यमा व्यस्त हुन्छन्। उनको विश्वास छ कि संसारमा केही ठूलो हासिल गर्न निरन्तर संघर्षको आवश्यकता पर्छ।
