काठमाडौँ : बैंकिङ क्षेत्र सर्वसाधारणका लागि विश्वासको स्थान हो, जहाँ मानिसहरूले आफ्नो पैसाको सुरक्षित र प्रभावकारी लगानीको आशा राख्छन्। यस संवेदनशील कार्यलाई सहज तरिकाले सञ्चालन गर्ने बैंक तथा वित्तीय संस्थामा रोजगारी प्राप्त गर्नु सामान्यत: सजिलो हुँदैन। यसका लागि धेरै समय, मिहिनेत, धैर्यता र लगनशीलता आवश्यक पर्छ।
वित्तीय संस्थामा कर्मचारी बन्न चाहने धेरैजसो विद्यार्थीहरू मेनेजमेन्ट अध्ययनमा प्रवीण हुन्छन्। तर केवल शैक्षिक योग्यतामा मात्र भर नपरी, वास्तविक संसारका चुनौतीहरूको सामना गर्नका लागि अन्य आवश्यक गुणहरू पनि महत्त्वपूर्ण छन्।
आजका विद्यार्थीहरूमा इनर्जी र सकारात्मक दृष्टिकोणको कमी देखिन्छ। बैंकको प्रणाली मात्र बुझेर इगो राख्ने व्यक्तिहरूले बैंकमा जोखिम सिर्जना गर्न सक्छन्, त्यसैले बैंकहरू कर्मचारी छनोटमा अत्यन्त सावधान रहन्छन्।
बैंक तथा वित्तीय संस्थामा इमान्दार, मेहनती, लगनशील र सक्षम कर्मचारीहरू आवश्यक छन्। यस्ता कर्मचारीहरूले आफूलाई सानो पदबाट नै शुरु गर्न हिचकिचाउनु हुँदैन। सानो पदमा काम गर्दा अनुभव र आत्मविश्वास बढ्छ जसले भविष्यमा मेनेजर तहमा पुग्न मद्दत पुर्याउँछ।
शैक्षिक योग्यता आवश्यक छ, तर केवल शैक्षिक योग्यताले मात्र पुग्दैन। बैंकमा काम गर्न चाहनेले बैंकिङ जोखिम, अवसरहरू र बैंकको कार्यविधि बारे राम्रो ज्ञान राख्नु पर्छ। बैंकमा जागिरको लागि आवेदन दिनु अघि बैंकको बारेमा सन्दर्भ र पछिल्लो नीतिहरू बारे जानकारी राख्नु अत्यावश्यक छ।
अहिलेका विद्यार्थीहरूमा कार्यप्रति उत्साहको कमी छ। उनीहरूले केवल उच्च पदको आशा राखेका छन् र सीधै ठूलो पैसा कमाउने चाहना राख्छन्।
तर सफलता र प्रगति मेहनत र लगनशीलतामा निर्भर गर्दछ। बैंकहरूले यस्ता व्यक्तिहरूलाई छनौट गर्छन् जसको मनमा केही गर्नका लागि ऊर्जाशील र धैर्यपूर्ण भावना हो।
वित्तीय अनुशासन पनि अत्यन्त महत्त्वपूर्ण छ। यदि कर्मचारीले वित्तीय अनुशासन मान्दैनन् भने बैंकको छवि र प्रतिष्ठामा नोक्सान पुग्न सक्छ। बैंकहरू ती व्यक्तिहरूलाई प्राथमिकता दिन्छन् जसले आफ्नो जिम्मेवारी र निर्णयमा जवाफदेही हुन सक्छन्।
नातागोताबाट भन्दा पनि, बैंकमा काम गर्नका लागि सक्षम र योग्य व्यक्तिहरूको आवश्यकता छ। राम्रो क्षमता भएका व्यक्तिहरूले मात्र बैंकलाई प्रगति गराउन सक्छन्।
अर्थात, बैंकिङ क्षेत्रमा सफल हुनका लागि मात्र शैक्षिक योग्यतामा ध्यान दिनु हुँदैन, आफूलाई सबै पक्षमा दक्ष बनाउने प्रयास पनि गर्नुपर्छ। योग्य र दक्ष व्यक्तिहरूलाई मात्र बैंकमा अवसर मिल्छ।
