काठमाडौँ : हिन्दू नेपालीहरूको सबैभन्दा ठूलो चाड दशैं नजिकिँदै गर्दा काठमाडौंको बजारमा व्यापार व्यवसायको चहलपहल बढेको छ। दशैंका लागि कपडा, खाद्य सामग्री र मासुजस्ता वस्तु किनमेल गर्नेहरूको भीड देख्न सकिन्छ। विपद्का कारण केही आपूर्तिमा कठिनाइ भए पनि बजारमा तयारी तीव्र छ।
दशैंमा खसी, बोका, च्याङ्ग्रा र भेडाको आपूर्तिमा कमी हुने हो कि भन्ने चिन्ता भइरहे पनि कलंकी खसी बजार व्यवस्थापन समितिले उपत्यकामा मासुको कमी हुन नदिने जनाएको छ। समितिका व्यवस्थापक जीवनराज खतिवडाका अनुसार विगतका वर्षहरूमा जस्तै यस वर्ष पनि काठमाडौंको माग पूरा गर्न ३५/४० जिल्लाबाट खसी, बोका, च्याङ्ग्रा भित्र्याउने काम भइरहेको छ।
हाल जिउँदो खसीको मूल्य प्रतिकिलो ६ सयदेखि ७ सय ४० रुपैयाँसम्म र च्याङ्ग्राको १२ सय ५० देखि १३ सय रुपैयाँसम्म रहेको छ। रसुवा र तातोपानी नाका बन्द रहेकाले च्याङ्ग्राको आपूर्ति मुख्यतः मुस्ताङबाट मात्र भइरहेको छ। जसका कारण यसको मूल्य केही महँगो भएको छ।
विगतका वर्षहरूमा घटस्थापनादेखि नवमीसम्म ४५ हजार खसीबोका बिक्री हुने गरेकोमा यस वर्ष पनि त्यस्तै अनुमान गरिएको छ। साथै काठमाडौंमा मासुको माग घटिरहेकोले यो व्यापारमा केही असर परेको व्यापारीहरूले बताएका छन्।
