भदौ २९,काठमाडौं :साउदी अरबको अलकसिम भन्ने ठाउँमा २० नेपाली अलपत्र परेका छन् । उनीहरु विगत चार महिनादेखि अलपत्र परेका हुन् । सितापाइलामा रहेको एडभेन्चर ह्युमन रिर्सोसमार्फत साउदी पुगेका उनीहरूले अलपत्र परेका बताएका छन् ।
करिब डेढ वर्ष अघि साउदी पुगेका उनीहरूलाई चार महिनादेखि कम्पनीले काम र तलब नदिएर विचल्ली बनाएको हो । अलपत्र परेकाहरूको बास सडकमा छ । उनीहरूलाई विभिन्न व्यक्ति तथा संस्थाको सहयोगमा खाने व्यवस्था मिलाइएको छ ।
‘काम पनि दिएको छैन् । तलब पनि दिएको छैन् । हामीलाई खानको लागि १०–१५ दिनमा १०० रियाल दिइरहेको छ । त्यो पैसाले हामीले के गर्ने ? मेनपावर कम्पनीसँग भन्दा चुप लागेर बस भनिरहन्छ । उल्टै गुण्डा लगाएर धम्की दिन्छ ।’ एक पीडितले बताए।
बाथरूमको पानी खाएर बस्नु परेको ती पीडितको भनाई छ । कम्पनीले उनीहरू सबै जनाको पासपोर्ट खोसेर राखेको हो । यो विषय सामाजिक सञ्जालमार्फत सार्वजनिक भएपछि सरकारको ध्यानाकर्षण भएको छ । श्रम, रोजगार तथा सामाजिक सुरक्षा मन्त्रालयले उनीहरूको उद्धारको पहल थालेको हो । रोजगारदाता कम्पनीसँग सम्बाद भएको मन्त्रालयले जनाएको छ ।
वैदेशिक रोजगार विभागका महानिर्देशक मदन दहालले श्रम काउन्सुलर गएर भेटेर कुराकानी भइसकेको जानकारी दिनु भएको छ । ‘सप्लायर्स कम्पनिमार्फत गएका रहेछन्। अर्को काममा लगाउन नसकेको रहेछ। खान बस्न समस्या थियो। अहिले श्रम कन्सुलरमार्फत त्यसको व्यवस्था मिलाईएको छ ।
रोजगारदाता कम्पनीसँग समेत छलफल भइरहेको उहाँले बताउनु भयो । उनीहरू काममा पुनःस्थापित गराउने सहमति भएको छ उहाँको भनाई छ। सहमति कार्यान्वयन नभएको खण्डमा वा ढिलाई भएको खण्डमा श्रम अदालत जाने तयारी भइरहेको मन्त्रालयले जनाएको छ ।
