भदौ २४,काठमाडौं : नेपाली कांग्रेसका नेता डा. शेखर कोइरालाले बीपीको समाजवाद व्यवहारमा लागु हुन नसकेको बताउनु भयो । ११०औँ बीपी जयन्तीका अवसरमा आइतबार चितवनमा आयोजित बीपीको सालिक अनावरण तथा वृक्षरोपण कार्यक्रममा उहाँले यस्तो बताउनु भएको हो ।
बीपीले भनेजस्तो गरिब असहाय र समाजमा पछाडि परेकाहरूलाई निःशुल्क शिक्षा, स्वास्थ्य र रोजगारको व्यवस्था हुन नसकेको उहाले बताउनु भयो । ।
अग्रज नेताहरूको सम्झनामा बनाइएका कतिपय सालिक आन्दोलनका क्रममा तोडफोड गरिएको र सालिकहरूको संरक्षण गर्नका लागि अभिलेख राख्न जरुरी रहेको उहाँको भनाई छ ।
नेता कोइरालाले लोकतन्त्रमा अराजकता नभई भ्रष्टाचारविरुद्ध शून्य सहनशीलता आवश्यक रहेको बताउनु भयो । पारदर्शिता तथा जवाफदेहिता लोकतन्त्रको मूलभूत सिद्धान्त रहेको बताउदै अहिले कांग्रेस यो कुराबाट कतै विचलित भएको हो कि भन्ने आफूलाई लागेको उहाँको भनाइ छ ।
