काठमाडौं : नेपाल टेलिकमले दशैँ, तिहार तथा छठ पर्वलाई लक्षित गर्दै ‘दशैँ–तिहार अफर २०८३’ सार्वजनिक गरेको छ। नयाँ एफटीटीएच इन्टरनेट जडानमा छुट, वार्षिक इन्टरनेट प्याकेजमा थप एक महिना सेवा तथा सहुलियत मूल्यका मोबाइल डाटा, भ्वाइस र एसएमएस प्याकेज यस योजनामा समावेश छन्।
कम्पनीले सार्वजनिक गरेको जानकारीअनुसार असोज २५ देखि कात्तिक ३० गतेसम्म नयाँ फाइबर टु द होम (एफटीटीएच) प्याकेज जडान गर्ने ग्राहकले ५०० रुपैयाँ जडान शुल्कमा छुट पाउनेछन्। यसैगरी, १००, १५० र २०० एमबीपीएस क्षमताका नयाँ वार्षिक प्याकेज खरिद गर्ने ग्राहकले १२ महिनाको शुल्कमा १३ महिनासम्म इन्टरनेट सेवा उपयोग गर्न सक्नेछन्।
वार्षिक इन्टरनेट प्याकेजमा थप एक महिना बोनस
नेपाल टेलिकमका अनुसार नयाँ वार्षिक एफटीटीएच प्याकेजमा एक महिना थप सेवा उपलब्ध हुनेछ। प्याकेजअनुसार बोनसका रूपमा दिइने मोबाइल डाटा सुविधा पनि १३ महिनासम्म प्राप्त गर्न सकिने कम्पनीले जनाएको छ।
भर्चुअल सेट–टप बक्ससहितको प्याकेजमा भने यसअघि नै एक हजार रुपैयाँ छुटको सुविधा उपलब्ध रहेको कम्पनीले जानकारी दिएको छ।
४९९ र ६९९ रुपैयाँमा मोबाइल डाटा अफर
नेपाल टेलिकमले जीएसएम मोबाइल सेवाका ग्राहकका लागि दुई प्रकारका ‘फेस्टिभल अनलिमिटेड’ प्याकेज ल्याएको छ।
-
४९९ रुपैयाँको फेस्टिभल अनलिमिटेड: प्रतिदिन ५ जीबी उच्च गतिको डाटा उपलब्ध हुनेछ। दैनिक ५ जीबी खपत भएपछि बाँकी समयावधिमा २ एमबीपीएस गतिमा असीमित डाटा प्रयोग गर्न सकिनेछ।
-
६९९ रुपैयाँको फेस्टिभल अनलिमिटेड प्रिमियम: प्रतिदिन १० जीबी उच्च गतिको डाटा पाइनेछ। उक्त सीमा सकिएपछि बाँकी समयावधिमा ३ एमबीपीएस गतिमा असीमित डाटा चलाउन सकिने कम्पनीले जनाएको छ।
