काठमाडौँ : हिमालय एयरलायन्सले पोखरा र ल्हासाबीच उडान गर्ने भएको छ । एयरलायन्सले हप्तामा एक उडानको तयारी गरेको हो । उडान मार्च ३१ देखि सुरु हुनेछ ।
“हामीले काठमाडौं–ल्हासा–पोखरा–ल्हासा–काठमाडौं सेक्टर जोड्न तथा मागको आधारमा आगामी दिनमा उडानहरू थप्ने योजनासहित हप्तामा एउटा उडान सञ्चालन गर्दैछौँ,” एयरलायन्सले जारी गरेको विज्ञप्तिमा भनेको छ ।
पहिलो उडान मार्च ३१ बिहान साढे ८ बजे त्रिभुवन अन्तर्राष्ट्रिय विमानस्थलबाट ल्हासा गोंगर विमानस्थलमा पुग्ने र सोही दिन ल्हासा–पोखरा उडान दिउँसो १ः१५ हुने जनाइएको छ ।
“हिमालयको मुख्य उद्देश्य चीनका विभिन्न १० पर्यटकीय क्षेत्रमा उडान सञ्चालन गर्ने र १० लाख चिनियाँ पर्यटकलाई नेपालमा स्वागत गर्ने हो,” हिमालय एयरलायन्सका उपाध्यक्ष विजय श्रेष्ठले भने ।
